ՈԱԱԿ-ը օրերս հյուրընկալել էր Երևանի Խ. Աբովյանի անվան մանկավարժական համալսարանի ներկայացուցիչներին։ Հանդիպման նպատակը մանկավարժական մի քանի մասնագիտությունների համար այժմ մշակվող պետական կրթական չափորոշիչների քննարկումն էր՝ որակի ապահովման գործընթացներում դրանց կիրառման համատեքստում։
Մասնագիտական կրթական համակարգում տեղի ունեցող զարգացումները՝ ինչպես մեր երկրում, այնպես էլ միջազգային ասպարեզում, հանգեցնում են այն համոզմանը, որ որակի ապահովման գործընթացներում կարևորվում է պետական կրթական չափորոշիչների ներկայացումն ուսումնառության արդյունքներով։
«Բարձրագույն կրթության որակի ապահովումը» խորագրով փետրվարի 26-ին Երևանում կայացավ միջազգային աշխատաժողով, որը Եվրոպական Հանձնաժողովի Թայեքս /TAIEX/ ծրագրի աջակցությամբ կազմակերպել էր ԿԳ նախարարությունը։ Նպատակը եվրոպական երկրներում բարձրագույն կրթության որակի ապահովման ասպարեզում փորձի փոխանակումն էր։ Աշխատաժողովին մասնակցում էին և ելույթով հանդես եկան փորձագետներ Ֆրանսիայից, Գերմանիայից, Ֆինլանդիայից և Լատվիայից։
Մեր երկրում որակի ապահովման համակարգի ներդրման հնարավորությունների ու խնդիրների մասին խոսեց «Մասնագիտական կրթության որակի ապահովման ազգային կենտրոն» հիմնադրամի տնօրեն Ռուբեն Թոփչյանը։ Նա ներկայացրեց նաև մասնագիտական կրթության որակի ապահովման հայաստանյան հնարավոր մոդելի ՈԱԱԿ տարբերակը։
2010-ի հունվարի վերջին տեղի ունեցավ նաև ՈԱԱԿ կենտրոնի տնօրեն Ռ. Թոփչյանի այցն Իսպանիա՝ Որակի գնահատման և հավատարմագրման ազգային գործակալություն, որը նույնպես փորձի ուսումնասիրության նպատակ ուներ։ Որակի ապահոման գործընթացներում իսպանացիների փորձառությունն ուշագրավ է, քանի որ գործընթացի մեկնարկային փուլում, բացի բժշկության և ճարտարագիտության մասնագիտություններից, մյուսների դեպքում հրաժարվել են միասնական չափորոշիչներից և ամեն բուհի հավատարմագրման համար հիմք են ընդունել նրա իսկ կողմից սահմանված չափորոշիչները։
Մասնագիտական կրթության որակի ապահովման կենտրոնն ընդլայնում է համագործակցության շրջանակը՝ մասնակցելով միջազգային համաժողովների ու կապեր հաստատելով արտերկրի գործընկեր կազմակերպությունների հետ` ինչպես լավագույն փորձը տեղայնացնելու, այնպես էլ հետագայում մեր երկրի արդյունքները միջազգայնորեն ճանաչելի դարձնելու նպատակով։
Մասնագիտական ուսումնական հաստատությունների ներկայացուցիչների հետ ՈԱԱԿ հանդիպումները շարունակվում են։ Դեկտեմբեր ամսին դրանց մասնակցում էին բուհերի ներկայացուցիչներ, այժմ երկրորդ փուլում քննարկումների մասնակիցները նախնական և միջին մասնագիտական ուսումնական հաստատությունների ներկայացուցիչներն են։
