ՈԱԱԿ-ի «Ուսանողության ձայն» նախագծի շրջանակում շարունակվում է ուսանող-փորձագետների հերթական վերապատրաստումը։ Այս փուլում մասնակցում են բացառապես բժշկական մասնագիտությունների ուսանողներ, որոնք դասընթացը հաջողությամբ ավարտելուց հետո կներգրավվեն առաջիկայում սպասվող բժշկական քոլեջների ծրագրային հավատարմագրման գործընթացներում։
Օգոստոսի 27-ին ապագա ուսանող-փորձագետները հանդիպեցին ՈԱԱԿ տնօրեն Ռուբեն Թոփչյանին։ Քննարկումն ընդգրկում էր ուսանողի դերի և ուսանող-փորձագետի գործունեության հետ փոխկապակցված մի շարք կարևոր հարցեր, մասնավորապես.
- Մասնագիտական կարողությունների ձեռքբերում․ ուսումնական գործընթացում կարողությունների ձևավորման առանձնահատկություններ, ուսուցման մեթոդների ազդեցությունը, ուսանողներին տրվող առաջադրանքների նշանակությունը, գնահատման դերը և գնահատման թերթիկների կարևորությունը։
- Փորձագետների կողմից հիպոթեզներ ձևակերպելու կարողություն․ փորձագետի աշխատանքի առանձնահատկությունները, հարցերի ճիշտ ձևակերպման և տեղեկատվության վերլուծության հմտությունները, փաստաթղթերի և մարդկանց հետ արդյունավետ աշխատանքի կարողությունները, ինչպես նաև տարբեր աղբյուրներից ստացված տեղեկության համադրման և ստուգման կարողությունները։
Դասընթացի շրջանակում տեսական նյութը լրացվում է գործնական առաջադրանքներով և հավատարմագրման գործընթացին նմանվող դերային խաղերով։ Բացի այդ, նախատեսված են նաև այլ հանդիպումներ ոլորտի փորձառու մասնագետների հետ, որոնք կկիսվեն իրենց գիտելիքներով և փորձով՝ նպաստելով ուսանող-փորձագետների պատրաստվածությանը։