Մինչև հունիսի 23-ը ՀՀ բարձրագույն ուսումնական հաստատություններում սովորող ուսանողները կարող են դիմել՝ անդամակցելու Եվրոպական ուսանողական միության (ESU) որակի ապահովման ուսանող-փորձագետների բազային։ Սա բացառիկ հնարավորություն է մասնակից դառնալու կրթության որակի ապահովման գործընթացներին միջազգային մակարդակով։
Մինչ այս ՈԱԱԿ-ի 8 ուսանող-փորձագետներ հաջողությամբ միացել են Եվրոպական ուսանողական միության որակի ապահովման ուսանող-փորձագետների բազային՝ մասնակցելով միջազգային գնահատումների։ Վերջին երկու տարիներին Հայաստանը Եվրոպական ուսանողական միությունում ներկայացնում է ԵՊՀ ուսանող Արթուր Դավթյանը։
Արթուրը ՈԱԱԿ-ին պատմել է իր մոտիվացիայի, անցած ճանապարհի և ձեռքբերումների մասին որպես ESU ուսանող-փորձագետ։
- Ինչպե՞ս սկսվեց քո ճանապարհը դեպի Եվրոպական ուսանողական միության ուսանող-փորձագետ դառնալը։ Ի՞նչն էր քեզ ոգեշնչել դիմել անդամակցության համար։
-Որակի ապահովման ոլորտում իմ ուղին մեկնարկեց դեռ քոլեջում։ Քոլեջում սովորելու տարիներից անդամակցեցի ՈԱԱԿ «Ուսանողության ձայն» նախագծին և հետագայում ակտիվորեն մասնակցում էի ՈԱԱԿ-ի կողմից իրականացվող դասընթացներին, աշխատաժողովներին։ Մասնակցեցի նաև հավատարմագրման գործընթացների որպես ուսանող-փորձագետ, ընդգրկվեցի իմ քոլեջում որակի ապահովման գործընթացներում։
Եվ իհարկե, հենց այդ շրջանում էլ առաջացել էր ցանկություն փորձ ստանալ ոչ միայն տեղական, այլ նաև օտարերկրյա որակի ապահովման կազմակերպություններից։
Երբ արդեն սովորում էի բարձրագույն ուսումնական հաստատությունում, Հայաստանում կուտակած փորձս և նպատակասլացությունս ինձ ուժ էին տալիս վստահ լինելու սեփական կարողություններիս վրա։ ՈԱԱԿ-ի աշխատակիցների աջակցությունն ու ոգեշնչող վերաբերմունքը նպաստեցին, որ վստահաբար լրացնեմ հայտադիմումը և դառնամ Եվրոպական ուսանողական միության որակի ապահովման ուսանող-փորձագետների բազայի անդամ։
- Ի՞նչ հնարավորություններ է քեզ տվել ESU-ում ներգրավված լինելը՝ մասնագիտական և կրթական մակարդակներում։
Եվրոպական ուսանողական միության ուսանող-փորձագետի կարգավիճակը ինձ հնարավորություն է տվել մասնակցելու մի շարք կարևոր վերապատրաստումների և ներգրավվելու փորձագիտական աշխատանքներում։ Արդյունքում ես ակտիվորեն ընդգրկվել եմ այնպիսի բազաներում, ինչպիսիք են ENQA-ի որակի ապահովման գործակալությունների արտաքին գնահատման փորձագետների, Մալթայի փորձագետների և Բիզնես կրթության եվրոպական խորհրդի (ECBE) որակի ապահովման դիտարկողների բազաները։
Այս փորձերն ինձ՝ որպես ուսանող-փորձագետի, ոչ միայն հնարավորություն տվեցին ծանոթանալու տարբեր երկրների հեղինակավոր մասնագետների հետ, այլև եղան արժեքավոր փորձի փոխանակման հարթակ։ Այդ մասնագետները, որոնք խորապես մտահոգված են կրթության որակով և ուղղակիորեն ներգրավված՝ կրթական քաղաքականությունների մշակման ու միտումների ձևավորման գործընթացներում, իրենց փորձով ու մոտեցումներով կարևոր ազդակ դարձան նաև իմ հետագա գործունեության և մասնագիտական զարգացման տեսանկյունից։
- Ի՞նչ գործունեություն ես ծավալել որպես ուսանող-փորձագետ և ինչ ես սովորել այդ ընթացքում։ Կիսվիր քո փորձառությամբ։
Ես մասնակցել եմ բարձրագույն կրթության որակի ապահովմանը նվիրված մի շարք միջազգային դասընթացների։ Դրանք ոչ միայն հարստացրել են իմ մասնագիտական գիտելիքներն ու հմտությունները, այլև դարձել են անձնական զարգացման և ներշնչման կարևոր աղբյուր։
Մասնավորապես, մասնակցել եմ Եվրոպական ուսանողական միության (ESU) կազմակերպած ուսանող-փորձագետների նախապատրաստման «Որակի ապահովման փորձագետների ներածական դասընթաց»-ներին (2023 և 2024 թթ.), ինչպես նաև Բարձրագույն կրթության որակի ապահովման եվրոպական ասոցիացիայի (ENQA) «Գործակալությունների գնահատողների վերապատրաստում» ծրագրին։ Ես ընդգրկվել եմ որպես գնահատող փորձագետ՝ մասնակցելով Բիզնես կրթության եվրոպական խորհրդի վերապատրաստմանը, մասնակցել եմ «Տարբեր, սակայն հավասար (Միջ)ազգային որակի ապահովում» դասընթացին, որն ընդգծում էր բազմազանության ու ներառականության կարևորությունը որակի ապահովման գործընթացներում։
Այս ծրագրերի շնորհիվ ես խորացրել եմ կրթության որակի գնահատման մեթոդների իմացությունը, զարգացրել եմ արտաքին գնահատման կազմակերպման ու վերլուծության, թիմային աշխատանքի, վերլուծական մտածողության ու միջազգային չափանիշներին համարժեք գնահատման հմտություններս։
Այս փորձառությունը ոչ միայն հարստացրել է իմ մասնագիտական կարողությունները, այլ նաև ցույց տվել՝ որքան մեծ է ուսանողի դերն այս կարևոր ոլորտում։
-Քո կարծիքով՝ ինչո՞ւ է կարևոր, որ ուսանողները ներգրավվեն կրթության որակի ապահովման գործընթացներում։ Ինչպիսի՞ փոփոխություններ կարող են նրանք բերել։
Կրթության որակի ապահովումը նախևառաջ թափանցիկ, բազմակողմանի և շարունակական զարգացում ապահովող գործընթաց է, որը ներառում է տարբեր շահակիցների մասնակցություն և հաշվետվողականություն։ Այս համատեքստում ուսանողները՝ որպես բարձրագույն հաստատությունների հիմնական շահակիցներ և իրականացվող քաղաքականությունների ու ռազմավարությունների ուղիղ ազդեցության կրողներ, ունեն բացառիկ հնարավորություն ու պատասխանատվություն՝ խորապես պատկերացնելու և ճշմարտացի գնահատելու ոչ միայն ուսուցման որակը, ուսանողակենտրոնության մակարդակը և ուսանողական միջավայրը, այլև կառավարման, մասնակցության և որոշումների կայացման գործընթացների արդյունավետությունը։
-Ի՞նչ խորհուրդ կտայիր այն ուսանողներին, ովքեր մտածում են դիմել ESU ուսանող-փորձագետների թիմին միանալու համար։
-Կասեի` եթե մտածում ես դիմել, մի հապաղիր։ Խորհուրդ եմ տալիս ամբողջապես օգտագործել քո փորձառությունն ու տեսլականը` բարձրագույն կրթությունը ավելի լավը դարձնելու համար։
Եվրոպական ուսանողական միության որակի ապահովման ուսանող-փորձագետների բազան լավագույն ուսանողական հարթակն է միջազգային փորձ ձեռք բերելու, նոր մարդկանց հետ ծանոթանալու և իրական փոփոխությունների մաս դառնալու համար. այստեղ ոչ միայն սովորում ես, այլև քո ձայնը լսելի ես դարձնում կրթական բարելավումների համար։
Այն նոր հնարավորությունների և մարտահրավերների մասին է, իսկ ցանկացած մարտահրավեր ևս մեկ քայլ առաջ գնալու հնարավորություն է։
Եղիր բաց նոր փորձի նկատմամբ, պատրաստ սովորել և նույնքան պատրաստ կիսվել սեփական գիտելիքով՝ ի նպաստ համընդհանուր բարելավման։
