Կրթությունը գնալով ավելի դառնում է ուսանողակենտրոն և թվայնացված։ Վերջին տարիներին կրթության ոլորտում առկա են մի շարք միտումներ, որոնք կիրառվում են տարբեր ուսումնական հաստատություններում։ Մենք առանձնացրել ենք որոշ միտումներ կրթության ոլորտում, որոնք լայն կիրառում են գտել անցյալ տարի։
Զարգացած ուսումնական հաստատությունները կիրառում են արհեստական բանականությամբ աշխատող ծրագրեր, տեխնոլոգիաներ, մեխանիզմներ, որոնք հեշտացնում են ադմինիստրատիվ որոշ գործառույթների իրականացումը, օրինակ դիմորդների ընդունելությունը, հարցումների կազմակերպումը, նամակագրության կազմակերպումը շահառուների հետ և այլն։ 
Մասնավորապես ՝ արհեստական բանականությամբ աշխատող ծրագրերի միջոցով դիմորդների ընդունելության կազմակերպումը հեշտացնում է դիմորդների հավաքագրումը, ուսանողի ուսումնառության փորձառության կառավարումը, շրջանավարտների հետ հաղորդակցության ապահովումը և այլն։ Ուսանողի փորձառության կառավարման ընթացքում արհեստական բանականությամբ աշխատող ծրագրերը և տեխնոլոգիաները օգնում են նաև վերլուծել սովորողի առաջադիմությունը, կանխատեսել սովորողի՝ ուսումնառության վերջնարդյունքները և այլն։
Սոցիալական ցանցերը, կոմերցիոն ծառայություններ մատուցող կազմակերպությունները, մեդիաներ․․․գրեթե ամեն ինչ, որը ծավալում է նաև առցանց գործունեություն, հատուկ ալգորիթմների և համակարգերի միջոցով «վերհանում» է հաճախորդի նախասիրությունները և նախընտրությունները ՝ տալով համապատասխան առաջարկություններ։ Կրթությունը ևս հեռու չէ նման մեխանիզմների կիրառումից․ սովորողները, նրանց կարողությունները, մոտիվացիան, հմտությունները տարբեր են, ուստի կարևոր է յուրաքանչյուրին տրամադրել անհատական ուսուցման հնարավորություններ։
Անհատական ուսուցումը կարող է արդյունավետ լինել ի տարբերություն ավանդական ուսուցման՝ կառուցելով կրթական ծրագիր ուսանողի կերպարին համապատասխան՝ նախապես ունեցած տվյալների հիմքով վերլուծելով վերջինիս կարողությունները, սպասելիքները, նախասիրությունները։ Նորագույն տեխնոլոգիաների և ծրագրերի կիրառմամբ հնարավոր է այդ վերլուծությունները իրականցնել ավտոմատ, ինչպես նաև տրամադրել համապատասխան կրթական նյութեր, առաջադրանքներ։ Այստեղ կարող եք գտնել 10 հարթակ ՝ անհատական ուսուցման կազմակերպման համար։
Ներառող (immersive) կրթությունը կրթության կազմակերպման ձև է, որը կապ չունի ներառական կրթության հետ։ Այս մեթոդի շնորհիվ սովորողը «ներառվում» է դասապրոցեսի մեջ վիրտուալ տեխնոլոգիաների միջոցով, որոնք օգնում են ավելի մատչելի և հետաքրքիր մատուցել ուսուցանվող նյութը։
Օրինակ եթե ուսանողը ուսումնասիրում է տիեզերական օբյեկտները, հատուկ ակնոցի միջոցով նա կարող է «տեղափոխվել» տիեզերք, ավելի մոտ և իրական տեսնել երկնային մարմինները։ Այլ կերպ ասած՝ ստեղծվում է «վիրտուալ երկխոսություն», որը օգնում է սովորողին ավելի լավ ընկալել մատուցվող նյութը։
Ինքնուրույն և խմբային աշխատանքների միջոցով ուսուցումը չի կորցրել իր արդիականությունը․ ավելին՝ այն շարունակում է լայն կիրառություն ստանալ։ Ուսանողը պասիվ սովորողից վերածվում է ակտիվ հետազոտողի, ով անհատական կամ խմբի միջոցով կատարում է որոշակի առաջադրանք՝ նախագծում, իրականացում, արդյունքների ամփոփում և ներկայացում։
Նախագծահենք ուսուցումը ուսանողներին խորապես ներառում է սովորելու գործընթացնում ՝ իրական առաջադրանքներ կատարելու միջոցով։ Սա դասվում է ուսանողակենտրոն ուսուցման մեթոդների շարքին, որը օգնում է ուսանողներին զարգացնել խնդիրների լուծման, մարտահրավերների հաղթահարման, ինքնուրույն/խմբային որոշումների կայացման և այլ հմտություններ։ Այս մեթոդը հատկապես զարգացնում է քննադատական և ստեղծարար մտածողության, հաղորդակցության, ճգնաժամային իրավիճակներում արագ կողմնորոշման հմտություններ։
Գուգլ ընկերության ինժեներները ունեն «Հանճարի ժամ»․ սա նշանակում է ՝ կազմակերպությունը թույլ է տալիս իր ինժեներներին իրենց աշխատանքային օրվա 20%-ը տրամադրել այն աշխատանքին/նախագծին, որը նրանց շատ հետաքրքիր է և նախընտրելի։ Այսօր մարդկությունը օգտվում է Gmail-ից, կարդում է Google News, որոնք «Հանճարի ժամ» մեթոդի արդյունքներն են։
Այս մեթոդի նպատակն է շեղվել կենտրոնացած աշխատանքից և ժամանակ ծախսել այլ զբաղմունքների վրա, որոնք կրկին կապված են աշխատանքի հետ։ Սա օգնում է ուսանողներին ժամանակ տրամադրել իրենց հետաքրքրություններին, որոնք կապված են թեմայի կամ աշխատանքի հետ, սակայն ուսումնական ոչ ճկուն պլանի պատճառով մղվում են երկրորդ պլան։
